ياجـــــــــــعـــــــــفــــــــــر
*****************
للشاعر حمزه النور طيفور
******************
كمان ماشفته ياجعفر
النخل التركتو جراب مال هدل السبيط حمـــــــــــــــــر
والنيل المسيح ورمال هاج كضم الجروف دمــــــــــــــــر
ومن فوق جانا سايل السيل وقام لينا القشيش خدر
ونحن عطاله بس قاعدين بى نصو فريقنـــــــــا نجرجر
من دكان ولى دكان عوض كشب وعمى عــــــــــــمر
كمان ماشفته ياجعفر
بصلا" سبتو فى الحيضان قلعناهو عرقانين وفوقنا الحر
وبالجمَّاله نقلناهو جــــــبناهو القطــــــــــاطى ختر
وقلَّعنا العراريق ديك وعزلَّناهو كان لى سوقو يصبر
وقلنا يزيد يزيد ويزيد يزيد ويزيد وســـــــــــــــوقو يحر
ومترجنها الخمسين والميات ولسع فى التمنتاشر
كمان ماشفته ياجعفر
رطل الزيت بقـــــــالنا جنيه واللحـــــمه باأربعـــــــــــه وأأكـــــتر
قبضة الخدره بى طراده والسبروق تلاته عروق ولا معاهن قرين أخدر
وبيهو دا كلـــــــــــــو رضيانين عليــــــــــــنا المولى يتستر
كمان ماشفته ياجعفر
كمان ماشفته ياجعفر أخوك الكـــــــــــــــــاكــــــــــــــــن أتغير
بعد كسلو ورقاد الضل لى الحــــــــــفلات براهــــــو نــــــــــدر
مشالها مدينى جوف الليل ومع ودعبــــــيد ســــــــــاهــــــر
ومع كلماتو عوض العمده وكتين قال قام من شندى وأتحدر
القطر السريع يوم قام عواتى أرياحو ترمـــــــــــى شـــــــدر
وفى النقط مابقيف قال ســـــواقو أمــــــــــرو صـــــــــــــــــدر
كمان ماشفته ياجعفر
دخلنا الثوره سته ونص ولقيناهو المكان نور
أتعشينا والله وشربناهو شـــــــاى أحـــــــمر
وأتلقيتو سيد أحمد وعندو عليبه من صايدر
ولما شربتها أذكرت وأذكرت وأذكرت وأذكـر
أيام كنا فى الخرطوم وبار الامرا ياجعـــفر
كمان ماشفته ياجعفر
كمان ماشفته ياجعفر بدت الحفله جيت غير
كمان أتلملمو وجونا ناس هيثم وناس أيمن وناس أنور
وبنياتا" رقاب الريل لا ضاقن ســــــــــموم لا حـــــــــــــر
رقصن لى حسين شندى وقمته على العريس بشر
وقلتلو ألف ليك مبروك بيت عيــــال ومــــــــال أوفر
كمان ماشفته ياجعفر
كمان ماشفت ياجعفر جبد كرسى وبراى صنقَر
وطال اللـــــــيل وهبــــــــــــــــــــالى نسيم عطَّر
أتذكرت حجرالطير وأيام ما كنا فــــــــــــى العنبر
بنسرق فى سحور الناس ونتربص ونضحك قر
ندفقو كلو فى الواطه بعد ماناكل أب ســـــكر
ولمن تصبح الواطه وأصحابو وجــــــــوها تتغير
نقول ليهم أهملتو عارفين تيس الداخليه خطر
حليله لزيزه ديك أيام فكيف حالك معاها قطــــر
سوقو سلامى لى أبو السر وليكم شوقى بالاكتر
أنشاء الله تعودو للأوطان ونفرح بيكم ونطير فــــــر
أنشاء الله تعودو للأوطان ونفرح بيكم ونطير فــــــر
موضوع: شاعر حجرودسالم حمزه النور ( يا جعفر) 